Titel - Lobberich.de

Gedichte von Matthias Kamps

Die Jlocke van Sankt Sebastian

Hüer ich die Jlocke van Sankt Sebastian,: so froach ich mich: Watt kündije se aan?
Dänn emmer wänn se lühe,: hätt datt jätt tu bedühe.
Söö lühe feierlich de meesten Tiet,: bej kirchliche Fäste hörrt man se wiet,
öt neue Joar datt lühe se enn,: söö stemme so feierlich minne Senn.
Och bej Kengkdööp on erschte Kommuniu-en erschallt deä volle Jlockeklong,: als Hochzeitsjlocke habbe se all döck jelütt,
doch hörrt man mar een Jlock, mött enne melangkolisch dompe Jong,: so wet och jedder watt datt bedütt:
Eener uut oß Medde di-er de lätzte Rees,: die dou on ich irjendwann och änz dees.
So wullen oß die Jlocke emmer jätt sägge wänn se erklenge,: öt Sonnes roope se oß no de Mäss,
mar öt jeff noch sovöll anger Denge,: drömm lühe se och all änz verjäß.
Völl Lüh donnt se noch jarnet mi-er hüere,: ännije deet sojar datt Jebimmel stüere.
Doch ich mott sägge: Mich lett datt Jlockespi-el net koht,: dänn en oß Leäve, off wörr jongk sind oder oht,
bejleiten oß die Jlocken van Anfang aan,: oß Heimatjlocken van Sankt Sebastian.

Matthias Kamps 1987

Also, ich donn hej wirklich net övverdrieve,: wänn ich sägg: Oß Reiturnier eß en Sportfest der Superlative!
All sind se am Start die Rang on Nam habbe em Longk;: de Lüthemüele eß enne Bejriff hej römm on tömm,
veier Daach jeht öt hej richtich rongk: on öt stemmt ooch datt jonze Drömm-erömm.
Mött jeddes angere Turnier kann Lobberick sich meäte,: doa kannste Wiesbaden on Oake all bolld verjeäte.
Off bej de Dressu-er oder bej öt Spränge,: hej starte net bloß de bääßte Peärd,
ooch Spitzenreiter, die öt schließlich bränge,: dänn en joot Jespann datt eß jätt weärt.
So kri-eje wörr veier Daach jätt jeboane en öt Sossefälld,: Sport van öt Feinste, van Mensch on Deär;
so eß alles joot vörr öt Jubiläum beställt,: dänn em nächsten Joar lööt viefonsevvenzich Joar deä Steär!
Vörr osse R u F eß somött alles kloar,: heä jeht mött Lobbericker Wengk en öt Jubiläumsjoar!

Matthias Kamps Juli 2000

Man haat se hej all bolld verjeäte,: doch jätz erläff se en Reneßangs,
on wüerd se sich mött angere meäte,: hei Sötele övverhaup ken Schangs;
deä Kool, ich well öt net verheäle,: eß van en Mu-er, die lange Lobbericker jeäle.
Freuher woar se joot bekännt bej Mensch on Deär,: on üeverall oot man se jeär,
off roh, off jekock, als Zupp oder Jemööß,: wänn öt Mu-ere joaf, meek kener Knööß.
Drömm di-er se en Fälld on Jaard net feäle,: die Lobbericker lange jeäle.
Söö meek deä Nam "Lobberick" bekännt enne Wällt ,: mi-er noch wie Sammet on Sieh,
drömm meen ich, hei se noch jefällt,: en oß Wappen, ich wööß och wie;
die Leoparde blieve, die sulle net druut,: söö kri-e bloß jedder en Mu-er enne Schnuut.

Matthias Kamps 1988

En Kleinod, van Idealisten beställt,: eß osse Natu-erschutzhoaf en öt Sossefälld.
Natu-er pu-er kann man hej erleäve: on noch so ännijes doaneäve.
Dänn watt öt hej net jeff, datt jeff öt net,: öt eß bolld onmööchlich alles opptutälle,
ich wööß ävvel ooch net,: wie jeddes Plönntsche on Blömmke het,
mar öt jeff doa Äkspärten vörr alle Fälle.: Eß doch keener tu oht, vörr noch jätt tu li-ere,
drömm sull man reuch änz en Besichtijung riski-ere;: onger sachkundijer Führung, die alles erkleärt
on dich vleets en intäsiver Jespüer vörr de Natu-er bescheärt.: Datt mott man jesiehen habbe - doch außer Natu-er,
jeff öt ooch jätt vörr öt leibliche Wohl on sojar Kultu-er.: Mi-er verroan ich hej net, doa bön ich stu-er,
drömm mackt öch opp de Söck, no dän Hoaf van Lindersch Bu-er!

Matthias Kamps 2000

En Kleinod, medden en Lobberick jeleäje: eß osse Park, mött sin verschlongene Weäje,
mött Burch on Weiher eß heä en Oase en oß Stadt,: deä Nam "Ingenhoven" hätt emmer all enne jo-e Klang jehatt.
Opp bekweeme Bängk kann man hej drööme en frescher Luft,: em Freuhjoar oppneäme deä härrlichen Duft,
deä Jesang vanne Vüejel, die öm de Wätt tirili-ere,: datt Schnattere van die Eänge, die och deä Frühling spüere.
Rongk öm de Burch woard all so männich Fäst jevi-ert,: en frejer Natu-er man en besongere Atmospheäre spü-ert,
ejaal, off öt bej en wälltliche oder kirchliche Feier eß,: öm deä Ingenhovenpark beneidet man oß jeweß.
Heä eß datt Hart van Lobberick on kann kongkuri-ere mött de schönnste Plätze,: doch leider wet datt net jedder tu schätze.

Matthias Kamps 1994

Heä haat Trdiziu-en on sull och wärr Tradiziu-en kri-e,: doch net wie freuher bloß mött Värkesviehe,
nää, bloß deä Nam eß oblijatorisch,: öt jeff van Allem jätt, wörr sind joa och historisch.
Deä Lobbericker Värkesmärret woar bekännt en oß Longk,: on watt die Küschkes kohßete so dorr de Bongk,
datt joave se sojar en öt Radio du-er,: on datt interessi-eret net bloß ennen Bu-er.
Dänn net bloß die hoalete sich doa öt Bääste,: och völl kleen Lüh di-ere sich en Värke määste.
Öt Mittwochs an öt Bürjemeesteramt jing öt bej dän Handel rongk,: Joare laater woard oppen Bongartzplatz jefeilscht öm jeddes Pongk.
En jru-ete Körf kwiekete hej die Bagge jonz frej,: on üeverall woar och enne Neeßkaak doabej,
deä woar dann och öt bellichs on wänn datt Jeschäft sull jlöcke,: woard emmer noch änz versoot, deä Pries tu dröcke.
Datt woar en Spektakel, tu schön vörr anntukieke,: on sojätt söck opp van Daach sinnesjlieke.
Drömm kömp jätz ooch, watt komme muut,: mött de Härreskärmes lotte wörr die Sau eruut,
enne Värkesmärret jeff öt, mött sonz noch allerlei,: mar datt Jonze hätt niks te du-en mött Värkeserei.

Matthias Kamps 1990